نفسي اصــــرخ بأعلي صوت مني
نفسي اصرخ و خايفة ...............
خايفة الدنيا تسمعني
خايفة يكون ده موت الامل فيا
خايفة يموت اخر امل ليا
اصلي بتحجج ان الناس مش حاسه بيا
علشان صراخي مكتوم فيا و مقفول عليه اكثر من باب
و اهو خلاص فاضل باب
و إن انكسر .....
رااااح الامل و مات
و راحت وراه ايام و سنيين
بلتمس فيها العذر لناس ناسياني رغم احساسي ليهم بالحنين
و ان انكسر .....
خرج الصراخ
عدي الباب
و عدي طبلة الآذان
وصل ليهم و خبط علي قلوبهم
و قال فيه انسانه تعبانه
و مهمومه و حيرانه
فاض بيها الكيل و صبحت من جواها بالهم مليانه
قلبها خرج اللي جواه غصب عنه
و وصل ليكم و دق الباب
دق الباب و مفتحش انسان
ضاع الامل و مات
كنت بصبر نفسي انهم حاسيين
و يوم ما اصرخ هلاقي الف حزين
بس طلعت غلطان
و جوه مني غليان
مهما فاض و خرج اللي فيا بيزيد و يفضل مليان
خايفة علي الباب لا ينكسر و اشوف الواقع المر
خايفة الروح تروح و يفضل جسد حر
مش حر حرية فكر و عقل و كيان
و انما حر كالفرس اللي من غير لجام
جري و كسر الحواجز و هو مش عارف بيجري ليه !!!!!!
و اهو فاضل باب
باب واحد بس
و يوم ما ينكسر .................
_ اصله لازم ينكسر _
ساعتها علي حالي هقول يا رحمن يا رحيم
بس برده ربنا رحيم
و حتي الباب بعد ما ينكسر اكيد هلاقي حل من عند الله
بس ساعتها هيكون انكسر و اللي انكسر ميتصلحش
زي الجرح يتداوي بس اثره مراحش
و اديني لاول مرة في حياتي بكتب عامي و نسيت الفصحي
ما هو الهم في القلب زاد و نساني التحكم في الحروف و الكلمة و الفصحي
و الحس معدش قادر غير انه يجند الايدين تكتب اللي بيه و يفرمل العقل و ينسي البيان
بس ربنا قادر علي كل شئ و ارحم بيا من اي انسان
و قادر يعملي بعد الباب مليون باب
بس يا تري هقدر انسي اخر باب بعد ما ينكسر ؟!!!!!!!!!!
و لا ده وهم و هو اصلا عمره ما هينكسر ؟!!!!!!!!!!!
(((( الله اعلمــــ ))))
nermeen badr el den ©
1-7-2010 مـــ
ليست هناك تعليقات:
إرسال تعليق